Mae Aseem yn ymgyrchydd trefol, ysgolhaig ac ymarferydd sydd wedi gweithio yng Nghanada, Brasil, Ffrainc, Gwlad Groeg, Haiti, India, Moroco, y Deyrnas Unedig, a’r Unol Daleithiau. Mae hefyd yn Gyfarwyddwr Sylfaenol TRULAB: Labordy ar gyfer Dylunio Trawsnewid Trefol. Pan symudodd Aseem i Gaerdydd, treuliodd ddiwrnod yn cerdded o amgylch y ddinas gyda thîm Caerdydd Creadigol, gan ddod i adnabod ein hybiau creadigol a’n mannau cydweithio.
Ysgrifenna:
Wrth i ni ddathlu pen-blwydd Caerdydd Creadigol yn bump oed [“Penblwydd Hapus, Caerdydd Creadigol!”], rydym hefyd yn dathlu nifer o gydweithrediadau ac arloesiadau’r rhwydwaith, wrth fyfyrio ar ei gyfraniadau i ddinas-ranbarth Caerdydd yn y dyfodol. Mae dinasoedd ymhlith creadigaethau pennaf dynoliaeth, a gellir dadlau mai’r parth cyhoeddus yw eu hagwedd fwyaf arwyddocaol. Y parth cyhoeddus yw’r hyn sy’n gwneud dinas mor gyfoethog, mor gymhleth, ac mor llawn o botensial. Y parth cyhoeddus yw’r enghraifft orau o dir y llall. Mae’r parth cyhoeddus yn cynnwys rhwydweithiau gofodol a gyfansoddir gan fannau cyfarfod a rhyngweithio rhwng gwahanol gyrff, diwylliannau a syniadau.
Mae potensial helaeth y parth cyhoeddus yn gorwedd yn ei allu i weithredu fel catalydd ar gyfer cynhyrchu gobaith yn rhyngweithiol ac ar y cyd – trwy ddyfnhau dealltwriaeth ac adeiladu undod, creu breuddwydion, a dilyn gweithredoedd trawsnewidiol. Er bod tir y cyhoedd wedi’i seilio’n ofodol ar sawl graddfa mewn cyd-destunau daearyddol penodol, mae hefyd yn esblygu’n gyson gan fod bywyd dinesig dinas mewn fflwcs parhaus.
Mae’r agwedd fwyaf grymus ar y parth cyhoeddus yn gorwedd yn ei allu i ddylunio gwahanol fathau o gyhoedd. Nid yw’r cyhoedd byth yn bodoli’n syml; mae wastad yn cael ei greu. Mae’r cyhoedd yn cael ei greu o grwpiau o bobl sy’n cael eu gwneud a’u hailwneud gan weithredoedd pobl eraill. Er enghraifft, pan fo pryder neu awydd cyffredin (e.e. sy’n dod allan o argyfwng fel anghydraddoldeb trefol, diffyg tai fforddiadwy, neu seilwaith annigonol), mae galwad i weithredu’n greadigol a strategol ac yna mae grwpiau o bobl yn ymateb i’r galwad hwnnw a gelwir cyhoedd i fodolaeth.
Mae Caerdydd Creadigol wedi cyfrannu’n sylweddol at barth cyhoeddus a dyfodol y ddinas trwy ei arloesi cydweithredol mewn prosiectau fel y Grwˆ p Cydweithio Creadigol, Grwˆ p Ymchwil Gwyliau a Thechnoleg Ymgolli De Cymru, a’i bartneriaeth â’r Porth Cymunedol.
Yn bennaf oll, trwy ymdrechion o’r fath, mae Caerdydd Creadigol wedi galw cyhoedd i fodolaeth o gwmpas sawl agwedd ar greadigrwydd – yn ffurfiol ac anffurfiol – a all ddod yn sbardunau ar gyfer archwilio a thrawsnewid pellach.
