Dywedwch wrthym amdanoch chi'ch hun a'ch cefndir creadigol
Rwy'n Artist Gweledol ac yn Ddylunydd. Rwyf wedi fy hyfforddi fel Dylunydd Graffeg, yn gweithio mewn llawer o asiantaethau dylunio yng Nghaerdydd a’r cyffiniau. Rwyf wedi bod yn gweithio fel gweithiwr llawrydd ers rhai blynyddoedd bellach, sy'n caniatáu i mi archwilio celf a dylunio. Dros y 3 blynedd diwethaf rwyf hefyd wedi archwilio lluniadu digidol, yn deillio o brosiect animeiddio y bûm yn ymwneud ag ef, yn adrodd straeon lleisiau preswylwyr mewn cartrefi gofal.
Rydw i wedi bod yn Artist Gweledol Cymunedol ers dros 15 mlynedd. Mae fy nghalon mewn creu celf gyda phobl. Rwy'n mwynhau annog ac arwain eraill i fagu hyder a hefyd caniatáu twf personol. Mae fy ngwaith creadigol yn amrywiol iawn. Un diwrnod efallai y byddaf yn gweithio gyda phreswylwyr mewn cartref gofal, y diwrnod wedyn gyda phlant 5 oed mewn ysgol a diwrnod arall yn darlunio ar fy iPad.
Rwy'n parhau i archwilio llwybrau newydd i wneud fy ymarfer yn fwy hyblyg a chyffrous i mi fy hun. Yn ddiweddar, rydw i wedi cwblhau cwrs gwaith coed sydd wedi agor drysau i fy hoffter o weithio gyda phren. Rwyf hefyd ar hyn o bryd yn astudio ar gwrs ‘Therapi Celfyddydau Creadigol Integredig Cyfannol’ wrth i mi barhau i archwilio celf fel ffordd o wella llesiant pobl. Rwy’n teimlo’n ffodus iawn i gael gyrfa greadigol a pharhau i ddysgu a thyfu gyda phob prosiect rwy’n ymwneud ag ef.
Sut byddech chi'n disgrifio'ch gwaith?
Mae fy nghelf yn arbrofol, yn gerfluniol ac yn tyfu o hedyn syniad. Rwy'n casglu pethau sydd i raddau helaeth yn rhan o'r gelf a grëwyd. Pan fyddaf yn dod o hyd i olwyn feic ar ochr y ffordd rwy'n gweld ei photensial. Pan welaf ddarn o bren yn golchi i fyny ar y traeth rwy'n mwynhau ei unigrywiaeth llwyr. Mae hanes gwrthrychau rwy'n ffeindio, o wneuthuriad dyn neu naturiol, yn fy nghyffroi. Mae natur gadawedig y gwrthrychau hyn yn gwneud i mi fod eisiau eu hachub a'u troi'n ddarn celf. Rwy'n mwynhau defnyddio pren, hoelion, cortyn, clai, teipiaduron, blychau tun, eitemau sbringlyd, offer rhydlyd a phethau wedi'u golchi i fyny ar y traeth. Mae fy ngwaith yn adrodd stori ac rwy'n mwynhau cael naratif i'r hyn rydw i wedi'i greu.
Dywedwch wrthym am eich dyluniad ar gyfer y comisiwn hwn
Mae'r dyluniad yn gerfluniol, wedi'i wneud o floc o bren a ddarganfyddais. Mae’n fach ac yn cyd-fynd yn berffaith â logo Caerdydd Creadigol. Roeddwn i eisiau portreadu crynoder Caerdydd fel un o ddinasoedd lleiaf Ewrop. Mae'r dyluniad wedi'i adeiladu o haenau, gan archwilio gwahanol elfennau Caerdydd, o linellau syth yr adeiladau, i fannau agored gwyrdd y parciau a natur agored yr ardaloedd dŵr. Fy hoff adeilad yng Nghaerdydd yw strwythur hardd Canolfan y Mileniwm. Mae'r defnydd o len copr yn cynrychioli hyn yn bennaf. Y wifren yn y canol yw bwrlwm calon ganol Caerdydd. Mae beiddgarwch y lliwiau yn cynrychioli bywiogrwydd, amrywiaeth a chyfeillgarwch Caerdydd. Wrth i mi fod yn creu’r cerflun fe wnes i gadw mewn cof bopeth rwy’n ei fwynhau ac yn ei garu am y ddinas.
Beth mae Caerdydd yn ei olygu i chi?
Mae’r Ddinas i mi yn gryno, agored, croesawgar, cyffrous, amlddiwylliannol, creadigol, hwyliog ac amrywiol. Rwy’n mwynhau ehangder y parciau, harddwch fy nhaith gerdded leol (Llyn y Rhath), egni’r Bae yn yr Haf a’r cysgadrwydd ohono yn y Gaeaf. Rwyf wrth fy modd ei fod yn ganolbwynt i ddigwyddiadau anhygoel, y mae pobl yn dod i ymweld â nhw gyda chyffro. Rwy'n mwynhau cyferbyniad y bobl leol i'r myfyrwyr newydd. Mae Caerdydd yn ddinas gyfeillgar a chroesawgar sy'n amsugno'r holl ddiwylliannau gwahanol. Caerdydd yw: Chippy Lane, Diwrnodau Gêm, Cardiff Pride, Made in Roath, Canolfan y Mileniwm, y Stadiwm, y Farchnad, y Llyn, y Bae, Chapter, Heol Santes Fair ar nos Sadwrn, y Castell a’r bobl o bob cyfeiriad. o fywyd.
Poster Emma
