Beth yw Paned i Ysbrydoli?
Mae Paned i Ysbrydoli yn ddigwyddiad misol ar gyfer artistiaid, busnesau a gweithwyr llawrydd creadigol. Bydd y digwyddiadau anffurfiol hyn yn dod â chymuned greadigol Caerdydd at ei gilydd ar gyfer y tair elfen hollbwysig - cysylltiad, creadigrwydd a chaffein.
Ymunwch â ni am gyfle i gwrdd, cysylltu a dysgu gan bobl greadigol eraill, p'un a ydych chi newydd ddechrau neu wedi bod yn gweithio yn y diwydiant ers degawdau.
Paned i Ysbrydoli mis Mawrth: Pwy sy'n ofni arloesedd?
Ar gyfer Paned i Ysbrydoli mis Mawrth, rydym yn gwneud rhywbeth ychydig yn wahanol.
Dydd Gwener 8 Mawrth yw Diwrnod Rhyngwladol y Merched, ac eleni'r thema yw ‘Arloesi a Thechnoleg’. Pa gyfle gwell sydd i arddangos rhai o’r arloesi anhygoel sy’n digwydd yng nghwmnïau creadigol dan arweiniad menywod Caerdydd? Felly, y mis hwn rydym yn partneru gyda Creative Collective a Media Cymru i wneud yn union hynny.
Ymunwch â ni yn Sgwâr Canolog BBC Cymru i glywed gan banel o ferched disglair sy’n gweithio yn y sector creadigol a fydd yn rhannu eu barn ar yr hyn y mae arloesi’n ei olygu iddyn nhw, a sut aethon nhw ati i ymgorffori ymchwil a datblygu yn eu hymarfer. Byddwn yn archwilio astudiaethau achos, yn rhannu arfer gorau ac yn trafod sut i oresgyn rhwystrau i roi syniadau a phrosesau newydd ar waith yn eich busnes. Bydd cyfle hefyd i ddysgu am Gronfa Sbarduno Ffrwd Arloesedd Media Cymru sydd ar agor ar hyn o bryd ar gyfer ceisiadau.
Y panel
Bydd siaradwyr gwadd gwych yn ymuno â ni yn BBC Cymru Wales ar gyfer trafodaeth banel ar y pwnc ‘pwy sy’n ofni arloesedd’:
- Amy Daniel, gwneuthurwr ffilmiau arobryn
- Cwnselydd, hyfforddwr a sylfaenydd Elemental Health Angela McMillan
- Prif Swyddog Gweithredol stiwdio edge21, Rebecca Hardy
- Sarah Horner, Prif Weithredwr Hijinx, un o gwmnïau theatr gynhwysol fwyaf blaenllaw Ewrop
