Mae Katie, a aned yn ne Cymru, wedi dychwelyd i Gaerdydd yn ddiweddar, gan ddod nid yn unig â’i phrofiad o deithio gyda Kasabian a chyfweld â The Rolling Stones, ond hefyd ei hangerdd dros gefnogi cerddoriaeth newydd ac artistiaid Cymreig. Gan adeiladu ar hyn, mae Chwarae Teg wedi’i lunio fel cyfle i fandiau ac artistiaid newydd o Gymru gael cyfle i berfformio yn un o leoliadau annibynnol mwyaf poblogaidd y brifddinas – The Moon.
Dywedodd Katie:
Mae Cymru’n llawn o dalent gerddorol anhygoel ac wrth i mi symud ymlaen ar fy nhaith i ddysgu’r iaith Gymraeg, rydw i wedi darganfod a chysylltu’n ddwfn â cherddoriaeth Gymraeg. Pryd bynnag dwi’n DJ dramor, dwi wrth fy modd yn arddangos a rhannu gwaith anhygoel artistiaid Cymreig. Mae dechrau noson gerddoriaeth newydd yng nghanol Caerdydd sy’n ymroddedig i amlygu’r doniau hyn yn wir yn gwireddu breuddwyd ac ni allwn fod yn fwy cyffrous! Rwyf hefyd yn hynod ddiolchgar i Gaerdydd Creadigol am ymuno a helpu i ddod â’r weledigaeth hon yn fyw!
Dywedodd Pennaeth Caerdydd Creadigol, Jess Mahoney:
Ers ei lansio yn 2015, mae Caerdydd Creadigol wedi ymdrechu i gefnogi talent greadigol newydd y ddinas, gan helpu i adeiladu sîn ddiwylliannol gysylltiedig, gydweithredol a chynhwysol. Mae hyn wedi cynnwys comisiynu gwaith gan artistiaid ar ddechrau eu gyrfa, cefnogi lleisiau newydd mewn llenyddiaeth o Gymru a gweithio gydag ymarferwyr newydd a chyffrous i lunio a chyflwyno ein cynnwys. Gydag un llygad ar y dyfodol, mae’n hynod bwysig, ochr yn ochr â llwyddiant y sector cerddoriaeth yng Nghaerdydd, ein bod ni hefyd yn buddsoddi yn ein piblinellau o dalent gerddorol y dyfodol, ac yn dathlu ac yn gwarchod sîn gerddoriaeth llawr gwlad gyfoethog Cymru.
Cynhelir y Chwarae Teg cyntaf yn The Moon, Stryd Womanby ar 16 Hydref, gyda thocynnau’n costio £5 yn unig. Rydym yn falch iawn o gael cwmni tri artist anhygoel o Gymru ar gyfer ein digwyddiad cyntaf yn y gyfres hon:
Kalisha Quinlan (DJ)
Waterpistol
No Good Boyo (set DJ a llais)
P’un a ydych yn artist neu’n frwd dros gerddoriaeth, ymunwch â ni i ddathlu tirwedd gerddoriaeth fywiog Caerdydd.
Rhagor o wybodaeth a archebu tocyn.
Mwy am Ŵyl Dinas Gerdd Caerdydd
Gyda chefnogaeth Llywodraeth Cymru a Chyngor Caerdydd, nod Gŵyl Dinas Gerdd Caerdydd yw denu 20,000 yn ei blwyddyn gyntaf. Gan gwmpasu'r ŵyl gerddoriaeth newydd Sŵn a phenwythnos celfyddydau rhyngwladol Canolfan Mileniwm Cymru, Llais, bydd yr ŵyl yn lledaenu cerddoriaeth ledled y ddinas, gan herio, cyffroi ac ysbrydoli cefnogwyr ar draws cenedlaethau a genres.
Mae’r ŵyl yn cynnwys rhaglen lawn o dalent lleol a rhyngwladol, gan gynnwys Leftfield/Orbital a Ms. Lauren Hill & The Fugees. Lein-yp llawn ar gael ar y wefan.
Mae Caerdydd Creadigol hefyd yn cefnogi'r Wobr Gerddoriaeth Gymreig eleni, sy'n cael ei gynnal ar 8 Hydref, rhagor o wybodaeth.
Cynhelir Gŵyl Dinas Gerdd Caerdydd rhwng 27 Medi a 20 Hydref 2024.
