Mae ei record sengl ddiweddaraf, Agony and Rapture, yn cyfleu’r cyfuniad o deimladau a’r ymgyrchu sydd gymaint rhan o waith Celyn. “Ro’n i eisiau dangos fy mod i wedi fy llethu â chyflwr y byd drwy ddefnyddio cerddoriaeth a geiriau. “Yn anffodus, mae’r gân yn teimlo hyd yn oed yn fwy perthnasol ar hyn o bryd.” Ynghlwm wrth y trac, sy’n rhan o waith ar y cyd â’r cynhyrchydd J.Aria a chymorth gan Help Musicians, mae darn ar ffurf gweledol trawiadol gan bartner Celyn, Kostas. “Roedden ni eisiau rhoi cynnig ar iaith weledol sy'n cyfleu endidau creu a dinistrio yn ogystal â'r elfen ddynol sydd rhwng y ddau hyn."
Y tu hwnt i’r gerddoriaeth ei hun, mae Celyn yn gobeithio y bydd eu celf yn annog pobl i ymwneud â’r byd go iawn. “Rwy’n gobeithio y bydd fy ngherddoriaeth yn ysgogi newid gwleidyddol yn ymarferol,” meddan nhw. “Yr elfen fwyaf gwerthfawr am artistiaid yw eu bod yn mynd ati i amlygu pethau yn y gymdeithas a pheri bod newid go iawn yn digwydd – sef peidio â chilio i fyd syniadau haniaethol. Felly cofiwch wrando ar y gân, mae hi’n wych! Ac yna ewch i wrthdystiad dros Balestina, dros hawliau traws, yn erbyn ffasgaeth a hiliaeth. Gwnewch y cysylltiad rhwng y pethau hyn â chymerwch ran.”
Ar ôl treulio amser yn Llundain a Glasgow, mae Celyn wedi dychwelyd i Gymru yn ddiweddar – rhywbeth sydd wedi sbarduno ffyrdd newydd o feddwl ac egni creadigol. “Mae dychwelyd yn golygu ailddarganfod Cymru yn oedolyn,” meddan nhw. “Rwy wedi bod yn lwcus i gael fy nghroesawu’n gynnes, ac rwy’n edrych ymlaen yn fawr at y prosiectau ar y cyd y bydda i’n eu datblygu yn 2026.” Mae thema’r wythnos hon, Caerdydd Creadigol Meithrin eich rhwydwaith, yn berthnasol iawn i ffordd Celyn o gysylltu o’r newydd â’r sefyllfa greadigol yng Nghymru. “Y peth mwyaf defnyddiol oedd cysylltu â phobl eraill, peidio â bod ofn gofyn cwestiynau a dechrau’r sgyrsiau hynny.”
Maen nhw’n tynnu sylw at sefydliadau allweddol, er enghraifft SHIFT a Tŷ Cerdd a grwpiau gan gynnwys Cwm Rag, sy’n lleoedd cymunedol i grwpiau o bobl greadigol sy’n gwiar. “Pleser bob amser yw dod at ein gilydd am noson o anhrefn cwiar a dod â’r gymuned ynghyd i fwynhau sioe a chael dawnsio!”
Mae cyngor Celyn yn syml i bobl arall sydd eisiau cryfhau eu rhwydweithiau creadigol: “Peidiwch â bod ofn estyn allan at bobl. Mae’r cyfryngau cymdeithasol yn ffordd wych o ddod o hyd i bobl sy’n gwneud pethau diddorol yn eich ardal chi – ond does dim byd sy’n curo mynd i rywle go iawn yn fyw. Ewch â ffrind os bydd hynny’n helpu, ond mae hefyd yn werth bod yn anghyfforddus â mynd i ddigwyddiadau ar eich pen eich hunan.”
Mae eu halbwm diweddaraf Dying & Rising yn cael ei ryddhau y gaeaf hwn, ac mae eu hanes yn ein hatgoffa o sut mae ailgysylltu, gweithio ar y cyd, a bod yn bresennol (wyneb yn wyneb go iawn neu gydsefyll) yn gallu dylanwadu ar gerddoriaeth a’r diwylliant sy’n rhan ohoni.