Bydd CDCCymru yn perfformio hanner amser yn y stadiwm fel rhan o flwyddyn Cymru yn Ffrainc 2023 Llywodraeth Cymru.
Mae Cwmni Dawns Cenedlaethol Cymru yn creu dawns sy’n archwilio’r hyn mae’n ei olygu i fyw yng Nghymru a’r byd ar hyn o bryd. Byddan nhw'n perfformio rhan fach o ‘Say Something’, gwaith dawns diweddaraf y Cwmni gan y coreograffwyr Sarah Golding ac Yukiko Masui (SAY), i fît bocsio byw gan Dean Yhnell (Beat Technique) o Dredegar.
Dywedodd Paul Kaynes, Prif Weithredwr CDCCymru:
Mae hwn yn gyfle gwych i rannu ein hoffter o ddawns ac i gyfleu holl egni Cymru gyfoes gyda thorf enfawr ym Mharis. Daethom ar draws Dean Yhnell ym Mhenrhys yn Rhondda Cynon Taf, lle mae’n un o brif artistiaid y prosiect cydweithredol Above & Beyond yr ydym yn ei hwyluso.
P’un ai yw ym Mhenrhys neu Baris, rydym eisiau rhannu gweledigaeth o Gymru fel cenedl sy’n ddiwylliannol gysylltiedig, sy’n awyddus i roi adloniant i bobl ac i ysbrydoli.
Dywedodd y Prif Weinidog, Mark Drakeford:
Rwyf wrth fy modd bod Cwmni Dawns Cenedlaethol Cymru yn ein cynorthwyo i lansio’r flwyddyn Cymru yn Ffrainc, fydd yn archwilio’r cysylltiadau rhwng ein dwy wlad ar draws y celfyddydau, addysg, chwaraeon a busnes.
Mae CDCCymru yn arddangos Cymru gyfoes, amrywiol a chelfyddydol wych i’r byd.
Hoffwn ddiolch i’n partneriaid Celfyddydau Rhyngwladol Cymru, Cyngor Celfyddydau Cymru a’r Cyngor Prydeinig yng Nghymru a Ffrainc sydd wedi gweithio gyda ni i gynorthwyo’r gweithgaredd hwn.
